Deklaratë - Kemi qenë dhe jemi dakort që busti i Imzot Theofan S.Noli të vendoset në Durrës.

KISHA ORTHODHOKSE AUTOQEFALE E SHQIPËRISË

ZËVENDËSIA ARKIHIERATIKE – DURRËS

KISHA “APOSTULL PAVLI & SHËN ASTI”

   Adresa: Lgj. 3. Rr. Skënderbej, pranë BKT. Tel & Fax +355 522 307 67

DEKLARATË

Deklarojmë se kemi qenë dhe jemi dakort që busti i + Imzot Theofan Nolit të vendoset në Durrës.

Theksojmë se: ishte organizata “Foleja kombëtare shqiptare” që i ndërpreu bisedimet me Kishën “Apostull Pavli & Shën Asti” të Durrësit, për arsyet që ata i dinë dhe për asnjë moment për shkakun tonë. Sigurisht, këto çështje nuk zgjidhen as me panflete dhe as me ultimatume, por duke dialoguar me të gjitha palët.

Mënyra se si u veprua ditën e djeshme, nuk e nderon veprën e tij të jashtëzakonshme për Kishën dhe vendin, por e ul dhe fyen atë. Ne dëshirojmë që busti i + Imzot Theofan Nolit të jetë në Durrës, sepse aty i takon të jetë.

Për të realizuar këtë ne do të kërkojmë edhe bashkëpunimin e autoriteteve lokale vendore të qytetit.

Durrës, 30 qershor 2014

KISHA ORTHODHOKSE AUTOQEFALE E SHQIPËRISË

ZËVENDËSIA ARKIHIERATIKE – DURRËS

KISHA “APOSTULL PAVLI & SHËN ASTI”

Adresa: Lgj. 3. Rr. Skënderbej, pranë BKT. Tel & Fax +355 522 307 67

SQARIM



Sqarojmë besimtarët orthodhoksë dhe të gjithë opinionin e gjerë publik në lidhje me vendosjen e bustit të Episkop Theofan Nolit në qytetin e Durrësit se:

Kemi qenë dhe jemi dakort që busti i tij të vendoset në qytetin tonë.

Ju bëjmë me dije se, pas informacioneve jozyrtare që morëm, ne kontaktuam me personat nismëtarë, ku edhe një herë shprehëm gatishmërinë tonë për vendosjen e bustit në Durrës.

Gjatë kësaj kohe kemi qenë në pritje të kërkesës zyrtare nga ana e tyre, në mënyrë që në vazhdim të ndiqeshin të gjitha rrugët e ligjshme institucionale për realizimin final.

Deri në këto momente nuk kemi ende një kërkesë zyrtare në adresë të Kisha Orthodhokse Autoqefale Shqipërisë, Zëvendësia Arkihieratike “Apostull Pavli & Shën Asti”, Durrës.

Ndërkohë që jemi në pritje të kërkesës zyrtare, papritur mësuam se deklarohet që “bisedimet për këtë bashkëpunim paskan dështuar”! Sqarojmë edhe një herë, se nuk është e vërtetë që këto bisedime janë ndërprerë dhe as kanë dështuar apo iu është dhënë ndonjë përgjigje negative.

Mesa duket personat që po bëjnë deklarime të tilla e kishin paracaktuar që në fillim një përfundim të tillë, për të mënjanuar tërësisht Kishën tonë nga ky aktivitet dhe për ta përdorur më pas.

Urojmë që pas këtij sqarimi të gjendet dëshira e mirë për bashkëpunim dhe gjetjen e një zgjidhjeje optimale siç e kërkon edhe nderimi i një personaliteti poliedrik, si ai i Episkopit Theofan S. Noli.



Klerikët dhe anëtarët e Këshillit Kishtar



Durrës më, 28.06.2014