Publikuar më 14.11.2012 | 18:15 Shekulli
Profesor Panajot Barka
Duket qartë se kriza globale dhe veçanërisht ajo në Evropë, risjell
në skenë rregullin e vjetër të rizgjimit dhe nxitjes së nacionalizmave,
veçanërisht në ato vende me ekonomi të dobët e problematike, me
demokraci të pastabilizuar dhe për pasojë me probleme të karakterit
identintitar shoqëror, kulturor e etnik. Kohët e fundit kjo duket se po
përfshin keqas Shqipërinë dhe Greqinë, me tendencë për t’i futur në
zgrip marrëdhëniet midis tyre. Kjo më së shumti ka të bëjë me atë se
nacionalizmi ekstrem shqiptar ka bërë ushqim permanent antihelenizmin,
duke kujtuar kështu fillimet e shekullit të kaluar.
Nga ana tjetër,
kriza e Greqisë, si pasojë e keqmenaxhimit të situatës së brendshme
ekonomike e amplifikuar nga kriza e Eurozonës, po kthehet në një krizë
sociale. Në traditën historike të Greqisë, kriza dhe situata të kësaj
natyre janë kapërcyer me ide të fuqishme, të karakterit patriotik
(aspak nacionalist), që frymëzonin popullin për sakrifica sublime .
Kësaj here nuk ndodh kështu. Kemi masa ekonomike që rendojnë popullin e
thjeshtë dhe politikanë që kërkojnë të fshehin përgjegjësitë me
ndërmarrjen e rolit të shpëtimtarit. Boshllëku i ideve të mëdha
patriotike për shpëtimin e Greqisë nga recesioni ekonomik me pasoja
shoqërore, po zihet nga forca të tilla si SIRIZA, që ngriti flamurin
populist kundra masave ekonomike antikrizë të imponuara nga Evropa, dhe
Agimi i Artë me një nacionalizëm po populist, të papërcaktuar dhe
shpesh me një spontanitet që përmblidhet me zgjidhjen e problemeve
imediate të përditshme të njerëzve.
Ndër dy probleme kryesore, pas të
cilave u kap Agimit i Artë, në aspektin e brendshëm janë emigrantët e
paligjshëm dhe ai i minoritetit etnik grek (Vorio Epirit) i parë po si
problem i brendshëm. Do ta quaja të mirëpritur interesimin për
minoritetin etnik grek ngado që të vinte. Por kur ky interesim te kishte
ide, perspektiva e qëllime të qarta të cilat t’u përgjigjen
realiteteve aktuale , të kenë të gërshetuar arritjet historike të këtij
minoriteti me zhvillimet e sotme evropiane, por mbi të gjitha të kenë
parasysh vullnetin politik të vet këtij minoriteti. Importimi si
interesim i një fryme nacionaliste, e cila përmblidhet në zgjidhje të së
kaluarës e të kapërcyera, apo me parulla boshe, apo si një nacionalizëm
të rritur në Greqi për minoritetin grek që banon në Shqipëri, nuk
përbën zgjidhje. Më së shumti është një qëndrim që kthehet në ushqim
për nacionalizmin shqiptar, korrente e të cilit janë shtuar së fundmi.
Kështu minoriteti grek, i cili në mënyrë aktive , apo thjesht si
realitet natyral historik ka luajtur rol konstruktiv si sa i përket
ekuilibrave të brendshme në jug të Shqipërisë, por edhe në marrëdhëniet
Greqi-Shqipëri, mund të kthehet në lëndë midis mokrave të
nacionalizmave të dyanshme. Për më keq kur historia e fundit 20 vjeçare
ka provuar se përplasjet midis dy vendeve e ka kthyer këtë minoritetin
në viktimë të nacionalizmit shqiptar, pasi minoriteti gjithmonë
konsiderohet si përfaqësues i Greqisë dhe si mjet më efektiv në
duart e nacionalizmit të sëmurë ( e aspak të popullit shqiptar e të
strukturave të shëndosha politike, mediatike e shtetërore shqiptare )
ose për t’i bërë presion Greqisë, ose për të shfryrë dufin e vet në
pamundësi për të arritur Greqinë.
Kjo bëhet më rrezikshme po të kemi
parasysh se rrymat nacionaliste shqiptare, të cilat kohët e fundit kanë
mbërthyer edhe parti të koalicionit qeverisës, ushqehen fort nga një
antihelenizëm i skajshëm dhe për çdo gjë. Qëmtohet në Greqi edhe detaji
më i rëndomtë dhe më i parëndësishëm që të paraqitet si
antishqiptarizëm, për të rritur në ekstrem antihelenizmin. Po ju marr
një shembull të thjeshtë. Më 11 nëntor në një ceremoni të thjeshtë, por
zyrtarisht në nivel shumë të lartë, u përkujtuan të rënët anglezë në
tokën shqiptare. Më 28 tetor u përkujtuan, si tash 20 vjet, të rënët
grekë në të njëjtën luftë dhe kundër të njëjtëve armiq. Për të dytët, jo
vetëm që s`kishte prani zyrtarësh shqiptarë, por kishte incidente të
rënda antigreke (!!).
Në marrëdhëniet e veta ky nacionalizëm shqiptar
po i imponon Shqipërisë në qëndrimet ndaj Greqisë mentalitetin e njohur
të tipit 'pranoj që mbetem edhe unë pa bukë, po qe se vuan edhe
Greqia'. Kështu ka ndodhur me Korridorin tetë, kështu po ndodh edhe
tani me marrëveshjen e detit. Po ashtu, mënyra e konfliktualitetit
politik po përdoret edhe për të zgjidhur problemet e emigrantëve, apo
problemet pronësore të shqiptarëve në Greqi. Në një moment që të gjitha
këto duhet të ishin instrumentet e një fqinjësie të mirë dhe përfitimi
të përbashkët. Lë të mos harrojmë se edhe në Greqi ka segmente të cilët e
duan këtë ushqim nacionalist. Rastet e ditëve të fundit në kalimet
kufitare, flasin qartë për këtë. Ashtu siç flet qartë presioni që po i
bëhet qeverisë greke nga këta faktorë që ta derivojë në Bashkimin
Evropian si qëndrim e një fqinjësie jo korrekte të Shqipërisë ndaj
Greqisë, rritjen e nacionalizmit shqiptar. Një gjë e tillë do të ishte
me pasoja tepër të rënda për marrëdhëniet midis dy vendeve dhe për
aspiratën e Shqipërisë për integrimin në, Bashkimin Evropian.
Së fundmi
duket se nacionalizmi do të bëhet boshti kryesor i fushatës së ardhme
elektorale në vend, sidomos për parti politike jashtë boshtit kryesor
të qeverisë aktuale. Por ky nacionalizëm i shfaqur si përshkallëzim i
antihelenizmit mund të sjellë pasoja nga më të paparashikuarat, po të
kemi parasysh se edhe stabiliteti politik e shoqëror në Greqi nuk kanë
garancinë e dikurshme. Dhe dihet në raste të tilla valvula e shkarkimit
bëhet nacionalizmi, fara e të cilit është hedhur edhe në Greqi,
fatmirësisht deri tani jo si antishqiptarizëm.
No comments:
Post a Comment