Kemi ndjekur me vëmendje indinjatën e besimtarëve orthodhoksë të
Korçës dhe përcjellim edhe shqetësimin tonë në lidhje me dramën “Shën
Maria e Beratit”. Për komunitetin orthodhoks kjo është denigruese dhe
fyese, sepse denigrimi i klerikëve të nderuar orthodhoksë, është
denigrim për të gjithë komunitetin.
Komunitetet fetare në shqipëri
kanë vuajtur mbi shpatullat e tyre fyerjet, diskriminimin dhe
përndjekjet e regjimit ateist të shekullit që lamë pas. Prandaj jemi të
shqetësuar për vazhdimin e po të njëjtës mënyrë trajtimi të tyre edhe
sot.
Tashmë ka kohë që besimi
orthodhoks po goditet gjithandej me mënyra të ndryshme. Veprime të tilla
nxisin reagimin e çdo besimtari, si edhe cënojnë ruajtjen e harmonisë
dhe bashkëjetesës fetare, si vlerë që karakterizon shoqërinë tonë. Në
kohën kur ne përpiqemi të ndërtojmë ura bashkëpunimi dhe mirëkuptimi,
propagandat fyese përçajnë dhe ngjallin dyshime dhe mosbesime.
Me anë të kësaj deklarate,
protestojmë ndaj këtyre fenomeneve dhe i drejtohemi opinionit qytetar të
Korçës, por edhe më gjerë, se veprime të tilla që cënojnë komunitetet e
ndryshme fetare, të qëllimshme ose jo, nuk i shërbejnë interesave të
qytetit, të bashkëjetesës fetare dhe përparimit të shoqerisë shqiptare.
Këtë protestë e ndjejmë edhe si
obligim moral ndaj paraardhësve tanë, që me aq mund dhe sakrifica
mbajtën të pacënuar në shekuj besimin dhe moralin orthodhoks. Dhe për më
tepër Kisha Orthodhokse është një nga pjesët më të shëndosha të
shoqërisë sonë, me një kontribut të madh në ruajtjen e vlerave njerëzore
dhe në ndihmesën ndaj të gjithë njerëzve në nevojë, pa dallim.
No comments:
Post a Comment