Thursday, February 26, 2009

Berisha konstant ne grabitjen e prones se zones se bregdetit

Berisha: Nuk kemi lekë për kompensim financiar

Emirjon Senja | 26/02/2009 (Shekulli)

Kryeministri konfirmoi faktin se, për shkak të pamundësisë së kompensimit financiar, ish-pronarëve do t'u ofrohen prona në bregdet.

TIRANË - Përfundon procesi i identifikimit të sipërfaqeve të tokave, të cilat do të përdoren për kompensim fizik ndaj pronarëve, në pamundësi për të bërë dëmshpërblimin financiar.


Në mbledhjen e djeshme të Këshillit të Ministrave, Kryeministri Sali Berisha bëri të ditur se, për kompensimin e ish-pronarëve do të përdoret një sipërfaqe e konsiderueshme trojesh turistike në bregdet.


Ai informoi se, një grup i posaçëm ka punuar me intensitet për identifikimin e tokave publike në zonat turistike, për të kompensuar pronarët shqiptarë.


Duke theksuar se këto troje do të mund të përdoren vetëm në përputhje me parimet dhe platformën e zhvillimit të turizmit, kreu i ekzekutivit tha se, në brigjet turistike të deteve dhe liqeneve, janë identifikuar mijëra hektarë, dhe, territoret për këtë qëllim janë bregu i Adriatikut, një pjesë e bregut të Jonit dhe dy liqenet, të Shkodrës dhe të Pogradecit.


Madje, pjesë e fondit për kompensimin e ish-pronarëve mund të jenë edhe zona jashtë Parkut Kombëtar të Dajtit dhe malit të Priskës. Vendimi më i fundit i Këshillit të Ministrave vjen pas kërcënimeve të vazhdueshme të shoqatave të ish-pronarëve se, në rast se qeveria nuk do të zgjidhë problemin e tyre, ata do ta ndëshkonin atë me votë në zgjedhjet e 28 qershorit.

Gjatë fjalës së tij, Berisha siguroi se tokat, për të cilat bëhet fjalë, janë verifikuar me të gjithë dokumentacionin e duhur si troje publike, çka lejon më tej përcaktimin e procedurës së transferimit e shpërndarjes së tyre.

E ndërgjegjshme se është i pamundur kompensimi financiar i të gjithë sipërfaqes së tokës së zaptuar, qeveria u ofroi ish-pronarëve mundësinë e kompensimit fizik të tyre me troje turistike.


"Vetëm qendra e Tiranës, me çmimin e saj aktual dhe që pothuajse kudo ka pronarët e vet, përbën një bazë monetare aktualisht të papërballueshme, ndaj duhet të përdorim të gjitha mundësitë dhe, mundësia e parë më e madhe, është t'u ofrojë pronarëve troje turistike", - përfundoi ai.


Vetëm një muaj më parë, anëtari i kryesisë së shoqatës Pronësi me Drejtësi, Reshit Vorpsi, deklaroi se sipërfaqja e tokës që duhet kompensuar, është plot 80 milionë m³.


"Vendimi më i fundit i Këshillit të Ministrave vjen pas kërcënimeve të vazhdueshme të shoqatave të ish-pronarëve se, në rast se qeveria nuk do të zgjidhë problemin e tyre, ata do ta ndëshkonin atë me votë në zgjedhjet e 28 qershorit."

1 comment:

Kyritsis said...

Jam kurioz te di se si i gjeti tokat e lira ne bregdet Berisha. Toka te lira nuk gjen as ne Babru jo me ne bregdet. Nuk ka diktator me te ndyre se ai qe nuk te njeh pronesine dhe te gjithe keta steriotipa pushteti na rane ne ne pjese. Vetem autonomia lokale mund te zgjidhi lemshet qe krijojne keta kasaper te demokracise dhe njerezimit.