Publikuar më 27.12.2012 | 17:12
Qëllimi i këtij shkrimi, nuk ka të bëjë me parashtrimin e
argumentave, se sa mjerisht qesharake janë përfundimet e Censusit të
fundit, në lidhje me përqindjen që i korrespondon sipas tij komunitetit
Orthodhoks në Shqipëri sot në vitin 2012; pasi thjesht e vetëm po të
kemi parasysh regjistrimet e viteve tridhjetë dhe atyre të viteve
pesëdhjetë, të shekulli të kaluar, po të kemi parasysh përqindjen e
Orthodhoksëve sot qoftë dhe në qarkun e Korçës, të cilët e kalojnë
shifrën e njëqind e tridhjetë mijëve, dhe ky qark nuk ka numrin më të
madh të orthodhoksëve në Shqipëri, kuptohet se sa pa bazë janë të dhënat
e nxjerra nga ky Census, për të cilat pritëm kaq gjatë, dhe ata që e
organizuan u përpoqën të tregojnë “se u angazhuan” aq shumë, sa
natyrshëm të vjen ndërmend shprehja e goditur popullore në këtë rast “U
mbars mali dhe polli një mi, kur të gjithë prisnin që të lindte një
qytet”.
Ajo që ne këtë herë duam të bëjmë të ditur nëpërmjet këtij shkrimi,
është të denoncojmë këtë fushatë të re me maska të vjetra, të shpifjeve,
denigrimeve, goditjeve dhe fyerjeve që sot po i bëhen institucionit
të Kishës sonë Orthodhokse dhe përfaqësuesit dhe simbolit të saj sot në
Shqipëri Fortlumturisë së Tij Kryepiskopit Anastas. Në thelb asgjë nuk
ka ndryshuar, për këtë mjafton ti hedhësh një sy shtypit, hija e
mekanizmit të hershëm, të dikurshëm shfaqet përsëri dhe përpiqet të
irritojë turmat dhe të bëjë për vete ndërgjegjet e tronditura. Shpesh ky
mekanizëm i tillë, i ndryshkur ndihmohet nga aleatët e hershëm dhe nga
aleatët e rinj në emër të çorbës së vjetër. Gjithçka është e kuptueshme,
gjithçka dihet dhe bile ka qenë dhe e pritshme, të paktën për
intelektualët orthodhoksë, të cilët më shumë se kurrë janë krenarë që
bëjnë pjesë në një religjion që në shekuj ka ditur të krijojë dhe të
ruajë pa i manipuluar vlerat më të mira shpirtërore dhe materiale që ka
dhe paraqet sot kombi ynë, pa bërë asnjë kompromis dhe pa bashkëpunuar
asnjëherë historikisht me asnjë forcë pushtuese, administrative apo
politike. Në këtë kontekst edhe sot, ne qëndrojmë përkrah institucionit
të Sinodhit të Shenjtë të Kishës Orthodhokse dhe Kryepiskopit Anastas,
në këtë denoncim që ata ju bëjnë manipulimeve të këtij regjistrimi, të
cilat synojnë të kthejnë në minoritet, grupimin religjionar më të vjetër
dhe me më shumë kontribute në vend. Është detyra e kreut të Kishës sonë
që në emrin tonë, të të gjithë ne orthodhoksëve që e duam dhe e
përkrahim, dhe ne jemi të paktën 1\4 sot e popullatës vendase, të
denoncojë publikisht shtrembërimet e qëllimshme, të cilat shpesh bëhen
shkaku kryesor i prishjeve të ekuilibrave të brendshëm. E çuditshme dhe e
dënueshme do të ishte për çdo orthodhoks të ndërgjegjshëm, sikur
institucioni i Kishës Orthodhokse do ta anashkalonte, dhe nuk do ta
merrte seriozisht, qoftë edhe për trashësinë e saj, këtë shaka pa kripë
të politikave të sforcuara, pasi Kisha e Krishterë parim të përhershëm
të saj ka të vërtetën, trumbetimin dhe mbrojtjen e saj. Kjo është
arsyeja pse një episkopi orthodhoks i kujtohet gjithmonë gjatë gjithë
kohës bile edhe në momentin e “Meshës Hyjnore”, se duhet të jetë
shpjegues i drejtë i së vërtetës, dhe vetëm nëse është i tillë ai mbetet
gjithmonë episkop orthodhoks, në rastet e tjera mund të jetë gjithçka,
një politikan i mirë, një diplomat i mirë, një punonjës social, një
bashkëpunëtor i mirë, por jo përfaqësuesi i popullit para Zotit të
drejtë dhe të plotfuqishëm. Dhe kryepiskopi ynë Anastas, është një
udhëheqës shpirtëror i sprovuar, i mençur dhe çka është më e
rëndësishmja, me shumë kontribute në vendin tonë.
Kështu e shohim ne intelektualët korçarë orthodhoksë dhe jo vetëm
orthodhoksë, këtë figurë të respektuar, i cili ka rritur dukshëm
dinjitetin e orthodhoksit shqiptar jo vetëm në Shqipëri, por edhe jashtë
saj, por, kjo është një temë e gjatë, së cilës ne i jemi referuar për
mëse njëzet vjet, kur si rezultat i paragjykimit vetëm për shkak të
përkatësisë etnike, personi i nderuar i Fortlumturisë së tij përgojohej
nga gojë të pista dhe ndërgjegje të përçudnuara. Si rezultat i kësaj
lufte aspak të “shenjtë” kundër tij, pra kundër Orthodhoksisë,
Kryepiskopi Anastas është figura më e monitoruar, nga shtypi dashakeq
dhe tendencioz, i cili është i tillë së pari me atë që ai përfaqëson,
pra me besimin e pastër Orthodhoks. Por si çdo e keqe që e ka një të
mirë, dhe kjo gjë ka patur të mirën e vet, pasi nga e gjithë kjo, është
publikuar dhe është bërë botërisht i ditur i gjithë kontributi i tij,
predispozicionet e tij, si dhe përkrahja që ai ka prej të gjitha forcave
progresiste në këtë vend. Fatmirësisht njerëzit dhe politikanët e
mençur e kanë nderuar Kryepiskopin për atë që ai mbart dhe përfaqëson;
duke nderuar atë, ne si shqiptarë kemi nderuar veten tonë, pasi nderimi
për vlerën dhe mirëbërjen është mirënjohje, dhe mirënjohja është veti e
qytetërimit. Kur kjo mungon, ose më keq akoma kur indiferenca i le
vendin deformimit dhe shpifjes, atëherë ata që e bëjnë këtë, nuk bëjnë
ndonjë gjë të madhe vetëm se vetë demaskohen dhe koha e ka treguar këtë
gjë.
Shoqëria europiane ku ne shpresojmë të aderojmë ka patur dhe ka dy
shtylla kryesore, ku ka mbështetur tabanin, prej të cilit në shekuj ka
krijuar vlerat e pakontestueshme që mbart, qytetërimin antik dhe
krishterimin. Për të ruajtur këto vlera Europa ka luftuar në shekuj, për
këto vlera luftuan dhe humanistët shqiptarë, si pjesë integrale e
Europës, për këto vlera luftoi populli shqiptar dhe heroi ynë kombëtar
Gjergj Kastrioti, bëmat e të cilit, e këtij atleti të Krishtërimit, u
përkthyhen gjatë shekujve XV – XVI – pothuajse në të gjitha gjuhët e
Europës dhe frymëzuan luftëtarët europianë, të cilët u sakrifikuan për
mbrojtjen e themeleve të Europës plakë nga agresioni i jashtëm, për
mbrojtjen e këtyre dy shtyllave. Pra edhe populli ynë pavarësisht
gjendjes së sotme, është krenar që ka kontribuar në mbrojtjen e këtyre
vlerave. Tharmi i këtij kombi nuk mund të ndryshojë me ndërhyrje të
jashtme aparetive, të cilat inkursionet e huaja janë përpjekur t’ja lenë
si shenjë zhbërjeje dhe tjetërsimi. Edhe Kryepiskopi ynë Anastas,
kryqëzohet në mënyrë të vazhdueshme pasi e ngre zërin dhe punon në emër
të këtyre vlerave, prandaj edhe titullin e e lartë të akorduar nga
shteti shqiptar që lidhet me emrin e Gjergj Kastriotit, Skënderbeut, e
meriton më shumë se çdo njeri tjetër, qoftë edhe për faktin e asaj që ai
përfaqëson, përveç sa ka bërë. Gjithçka dihet, gjithçka kuptohet,
pavarësisht që shpesh nuk ja vlen barra qiranë të merresh me
dashakeqësinë, se humbet kohën kot. Por në momente të caktuara është e
nevojshme që gjërat të thuhen ashtu siç janë, pasi e drejta dhe e
vërteta janë në vetvete të patjetërsueshme dhe koha gjithmonë i
evidenton.
Shpesh manipulimet, denigrimet dhe kundërvëniet kanë qenë dhe janë aq
të trasha sa fyejnë bile edhe inteligjencën më mediokre, prandaj është
detyrë e çdo institucioni, forumi, medie dhe çdo intelektuali që ti
denoncojë dhe ti publikojë ato me forcë. Ja pse ne intelektualët
orthodhoksë korçarë gjejmë mundësinë dhe falënderojmë institucionin e
Kishës dhe kreun e saj, për ngritjen e zërit, kundër një manipulimi kaq
fyes për ne, për vetë qëllimet që ai mbart në vetvete.
Vasil Tushi Pedagog
Vasillaq Kolaci Mësues
Arben Gjata Pedagog
Petrika Tanushi Ekonomist
Spiro Gjançi Pedagog
Dhimitri Kondakçi Inxhinier
Ylli Trajçe Aktor
Vangjush Dishnica Mësues
Dhionis Kotmilo Ekonomist
Vangjush Nikolicari Mësues
Niko Face Mësues
Artan Loci Ekonomist
Thoma Piluri Mjek
Vangjush Themeli Mësues
Grigor Mulla Mësues
Reitano Galica Mjek
Migena Shamblli Mësues
Vangjush Themeli Mësues
Vangjush Kotti Biznesmen
Thimaq Lapi Ekonomist
Sotiraq Dojçe Inxhinier
Sotiraq Simaku Biznesmen
Ernesti Golka Ekonomist
Maksim Lubonja Mjek
Themistokli Bambulla Theolog
Smaragda Kovaçi Mësuese
Milla Lubonja Ekonomiste
Aurora Simaku Juriste
Gjergji Trebicka Biznesmen
Vangjush Simaku Mësues
Dhe shumë të tjerë që për arsye vendi nuk i kemi shkruar emrat.
*Materiali është shpërndarë për mediat nga zyra e Shtypit e Kishës Autoqefale Orthodokse të Shqipërisë
No comments:
Post a Comment