Godo si zakonisht kunder homogjeneve greke

Shekulli

Presidenti i Asamblesë Republikane dhe politikani i njohur, Sabri Godo, e ka cilësuar shkelje të drejtave ndërkombëtare vendimin e dy ditëve më parë të qeverisë greke, për dhënien e shtetësisë greke shtetasve shqiptare që janë të pajisur me Kartën Homogjene. Në një deklarim për mediat, Godo ka saktësuar se normat ndërkombëtare ndalojnë dhënien e shtetësisë kolektive dhe se akte të tilla kanë bërë në të kaluarën shtete diktatoriale. Godo ka argumentuar gjithashtu, se qeveria greke i jep vetes lirinë të caktojë në mënyrë të njëanshme homogjenitetin e shtetasve shqiptarë. Duke folur edhe nën cilësinë e një prej hartuesve të Kushtetutës, Godo shtoi se është e papranueshme që Greqia t’i imponojë Shqipërisë ndryshimin e Kushtetutës, duke shfrytëzuar momentet e dobësisë së popullit shqiptar. “Mbetet në dorën e saj, të shpallë minoritare këdo shtetas shqiptar që është i disponuar që ta pranojë një gjë të tillë, dhe janë të shumtë ata që mund të pranojnë në kohën e sotme për shkak të kushteve tona të njohura tashmë Njerëzit duan punë dhe këtu nuk gjejnë dhe janë të detyruar që të përballojnë rreziqet e emigracionit dhe mua me duket se nuk është ndonjë gjë e mirë, që të përfitohet nga një moment dobësie”,- tha Godo. Ai mohoi gjithashtu, faktin se kryeministri Berisha mund të ketë dhënë pëlqimin e tij për këtë vendim, gjatë vizitës së tij në Greqi. Godo shprehet, se qeveria shqiptare në të njëjtën kohë duhet ta referojë këtë çështje në Parlamentin Evropian, OSBE dhe organizmat e tjerë euroatlantikë.