Kontrabanda, deputeti Neranxi nën hetim

http://www.korrieri.com/Aktualitet/691.html

Emri i deputetit të LSI-së, Nikollaq Neranxi, ka dalë gjatë hetimeve për kontrabandë. Dosja po hetohet nga Prokuroria e Përgjithshme

TIRANË - Dyshimet për kontrabandë dhe evazion fiskal çojnë në Prokurorinë e Përgjithshme deputetin e Lëvizjes Socialiste për Integrim, Nikollaq Neranxi. Dosja hetimore ku dyshohet se është përfshirë politikani biznesmen, ndodhet që prej një muaji në organin qendror të akuzës, ku ende nuk është marrë një vendim përfundimtar për pozicionin e Neranxit. Burime të sigurta pranë Prokurorisë së Përgjithshme konfirmuan për “Korrierin”, se në janar të këtij viti, njësia Task-Forcë në Prokurorinë e Tiranës ka vendosur të shpallë moskompetencën për një çështje hetimore me objekt shmangien nga detyrimet doganore, që ka nisur pas një denoncimi të Drejtorisë së Përgjithshme të Doganave. Argumenti i përdorur për shpalljen e moskompetencën dhe dërgimin e dosjes për hetim të mëtejshëm në Prokurorinë e Përgjithshme ka të bëjë me faktin se gjatë hetimeve gati 10-mujore nga Prokuroria e Tiranës, ka dalë në skenë edhe emri i deputetit Nikollaq Neranxi, i cili për shkak të imunitetit mund të hetohet vetëm nga organi qendror i akuzës, si autoriteti i vetëm që ka kompetencat për hetimin e personave me imunitet. I kontaktuar nga “Korrieri”, deputeti i LSI-së e quajti këtë çështje si presion të ministrit të Financave, Ridvan Bode dhe kryeministrit Sali Berisha, pasi ai ka denoncuar një sërë skandalesh të kësaj qeverie.

Denoncimi nga doganat

Në prill të vitit të shkuar, Drejtoria e Përgjithshme e Doganave depoziton në Prokurorinë e Tiranës një kallëzim penal, sipas të cilit denoncohej fakti se subjekti tregtar në pronësi të deputetit Nikollaq Neranxi iu është shmangur detyrimeve doganore. Kallëzimi i doganave i referohet periudhës 2003-2004, kohë gjatë së cilës kompania e Neranxit ka importuar mallra të ndryshëm, kryesisht artikuj ushqimorë, pa i deklaruar në doganë, çka do të thotë se u është shmangur të gjithë detyrimeve doganore e fiskale. Në denoncimin e Drejtorisë së Doganave citohen një sërë detajesh që kanë të bëjnë me veprimtarinë e subjektit tregtar në pronësi të deputetit të LSI-së, i cili akuzohet se, duke ushtruar ndikimin e tij, ka bërë të mundur kalimin e mallit në mënyrë të jashtëligjshme. Sipas burimeve, mësohet se Doganat, në bashkëpunim me Tatimet, kanë mbledhur të dhëna, që sipas tyre vërtetojnë faktin se subjekti tregtar në pronësi të Neranxit, në bashkëpunim edhe me autoritetet doganore të kohës, kanë krijuar në mënyrë të vazhdueshme lehtësira për subjektin në fjalë, duke ngritur dyshime për veprën penale të kontrabandës.

Hetimi nga Task-Forca

Për shkak të dyshimeve se në këtë çështje mund të ishin përfshirë edhe doganierë, kallëzimi penal i Drejtorisë së Doganave i është përcjellë njësisë Task-Forcë në Prokurorinë e Tiranës, e cila e ka hetuar çështjen për afro 10 muaj. Burime pranë Prokurorisë së Përgjithshme thanë për “Korrierin”, se gjatë hetimit të Task-Forcës janë pyetur një sërë zyrtarësh e ish-zyrtarësh të Doganave, të cilët dyshohet se janë përfshirë në veprimet abuzive që pretendohen nga Drejtoria e Doganave.

HETIMI

Dëshmitarët kundër deputetit

TIRANË - Grupi hetimor ka marrë dëshminë e punonjësve të kompanisë së Neranxit, të cilët kanë mohuar akuzat e ngritura nga doganat. Në të njëjtën linjë kanë qenë edhe ish-punonjës të këtij institucioni, të cilët pas largimit nga detyra janë vënë nën akuzë nga drejtuesit aktualë, të cilët i akuzojnë ish-doganierët për shpërdorim detyre dhe favorizim të subjekteve të caktuara, që janë në pronësi të ish-pozitës. Duke iu referuar këtyre të dhënave rezulton se dy dëshmitarë kanë përmendur emrin e deputetit Nikollaq Neranxi, si të përfshirë në këtë çështje. Në këtë moment, njësia e Task-Forcës ka ndërprerë hetimet dhe me anën e një vendimi për moskompetencë dhe e ka përcjellë dosjen hetimore në Prokurorinë e Përgjithshme.

KUVEND

Neranxi për Jalin

TIRANË - Deputeti Nikollaq Neranxi ka përsëritur dje akuzat për qeverinë shqiptare, në lidhje me skandalin e Jalës. “Zbulimi i përgjegjësisë së personave të palës shqiptare në lidhje me këtë projekt të Bankës Botërore ka për ta cënuar edhe më tepër imazhin e administratës së qeverisë “Berisha”, brenda dhe jashtë vendit”, - ka thënë Neranxi, duke shtuar se media prestigjioze “Fox News”, por edhe titullarët e Bankës Botërore e kanë në fokus këtë çështje. Ai shtoi se denoncon prej dy vitesh skandalin me tokat në Himarë, për të cilat ka akuzuar kryetarin e bashkisë, Vasil Bollanon, si person të implikuar në këtë aferë. “Akti barbar i ndodhur në fshatin e Jalës tronditi gjithë opinionin publik të vendit”, - shtoi Neranxi dje në Kuvend.

REAGIMI

Neranxi: Akuzat, presion i Bodes dhe i Berishës

TIRANË - Deputeti i Lëvizjes Socialiste për Integrim, Nikollaq Neranxi, deklaroi për “Korrierin”, se denoncimet ndaj tij për kontrabandë apo evazion fiskal janë presione që bëhen nga ministri i Financave, Ridvan Bode dhe kryeministri Sali Berisha. Sipas Neranxit, gjithçka është një formë presioni nga qeveria, pasi ai ka denoncuar një sërë skandalesh të qeverisë “Berisha”. Në një prononcim për “Korrierin”, Nikollaq Neranxi tha se nuk ka lidhje as me evazionin fiskal dhe as me kontrabandën, pasi këto akuza janë të sajuara, që bëhen pak kohë para zgjedhjeve nga qeveria aktuale, e cila sipas tij po bën çmos që të mos i denoncohen skandalet e njëpasnjëshme që mbajnë firmën e saj, siç janë abuzimet me tokat në bregdet. “Ridvan Bode dhe Sali Berisha janë të vonuar. Po ta kishin filluar më parë këtë çështje edhe mund të bënin ndonjë gjë, por tashmë kjo është diçka e vjetër. Ky është një presion i mirëfilltë që i bëhet një deputeti për të mos denoncuar skandalet e qeverisë së Sali Berishës”, - tha për “Korrierin” deputeti i LSI-së, Nikollaq Neranxi. Sipas tij, të gjitha akuzat e ngritura ndaj tij, qoftë publikisht apo dhe në institucionet hetimore janë tërësisht të qëllimshme, pasi ai ka qenë ndër të parët që ka denoncuar skandalin e pronave në bregdet, ku është përfshirë qeveria “Berisha” apo të afërm të kryeministrit. “Në Shqipëri gjithçka mund të ndodhë. Mund të vijnë që nesër dhe të të hedhin prangat, vetëm pse denoncon një skandal. Ky është një presion i qeverisë, sidomos tashmë në prag të zgjedhjeve”, - deklaroi Neranxi, i cili shtoi gjithashtu se nuk kishte dijeni mbi çështjen hetimore, që ndodhet në prokurori që prej muajit prill të vitit të shkuar. Në këtë kohë, Drejtoria e Përgjithshme e Doganave ka depozituar një kallëzim penale ndaj ish-punonjësve të këtij institucioni, të cilët dyshohet se kanë favorizuar subjekte në pronësi të ish-pushtetarëve.