Fjala e mirëseardhjes e Kryetares së Kuvendit Jozefina Topalli në seancën ku mori pjesë Kryeministri i Greqisë, Kostas Karamanlis

http://www.parlament.al/

I nderuar zoti Kryeministër Karamanlis
Shkëlqesi ambasadorë
Të nderuar kolegë deputetë
Kam kënaqësinë të pres në këtë parlament personalitetin e parë shumë të lartë që viziton Shqipërinë, pas anëtarësimit të saj në Aleancën e Atlantikut Verior, Kryeministrin e një vendi fqinj e partner, zotin Kostas Karamanlis.
I nderuar zoti Kryeministër
Ju, si përfaqësues i vendit që shënon demokracinë më të vjetër në botë, e dini se parlamenti është tempulli i lirisë, i demokracisë, është shtëpia e popullit, ndaj dhe vizita dhe fjala juaj këtu në emër të popullit grek është shumë e rëndësishme në historinë e lashtë e tradicionale të dy popujve tanë që i kanë rrënjët thellë në historinë e këtij kontinenti.
Kjo bashkëjetesë kaq e hershme sot është shndërruar në një bashkëpunim dinamik mes dy vendeve tona, por mbi të gjitha në një kohë bashkëpunimi në frymën e një epoke të re marrëdhëniesh.
Ju zoti Karamanlis, si Kryeministër i vendit të cilësuar djepi i demokracisë, vini sot këtu në një vend me një nga demokracitë më të reja në Europë pas rënies së regjimit komunist. E ne nuk ka si të mos jemi krenarë që në një kohë kaq të shkurtër kemi arritur të bëjmë reforma të mëdha , hapa galopante, zhvillim ekonomik të jashtëzakonshëm e të jemi krah demokracive më të vjetra në të njëjtën tryezë me kombet e lira , në të njëjtën aleancë të madhe të lirisë, NATO.

Termi demokraci vjen nga greqishtja dhe do të thotë që fuqinë e ka populli. Grekët dhe ilirët janë ndër popujt që u bënë më të njohur në historinë e lashtë të Ballkanit.
Qytetarët shqiptarë janë qytetarë Europianë, ata jo vetëm ndihen si të tillë por janë pjesë e qenësishme e këtij kontinenti. Ndaj dhe vokacioni i tyre europian është shndërruar në një energji të fuqishme për reformat që po shkurtojnë rrugën tonë drejt BE-së.
Unë ndihem mirë për rolin thelbësor të Parlamenteve të dy vendeve për forcimin e miqësisë dhe bashkëpunimit mes dy vendeve dhe dua të shpreh mirënjohjen për kontributin e Qeverisë, tuajin personal dhe të Parlamentit grek, për ratifikimet e MSA-së dhe Protokollit të Anëtarësimit të Shqipërisë në NATO.

Do doja të vlerësoja veçanërisht rolin e Qeverisë Parlamentit grek në aprovimin e një seri ligjesh që lidhen me proçesin e legalizimit dhe integrimit të emigrantëve shqiptarë në shoqërinë greke, duke mirëpritur në të njejtën kohë çdo vendim të ri që do të ndikonte në integrimin sa më të plotë të emigrantëve tanë në Greqi.
Me fazën e re të partneritetit në NATO dhe pas kësaj vizite tuajën në Shqipëri, shpreh bindjen edhe në emer të kolegëve të mi deputetë, se bashkëpunimi ynë do të jetë edhe më i fortë, edhe më intensiv, i orientuar plotësisht mbi bazën e parimeve të fqinjësisë së mirë, miqësisë tradicionale dhe bashkëpunimit në emër të interesave të dy popujve tanë pjesë e familjes së kombeve të lira.