E Enjte, 27.09.2012
"Biznesi shqiptar gati të blejë disa ishuj grek"
Publikuar më 27.09.2012 | 12:33
Kryetari i Partisë Drejtësi Integrim dhe
Unitet, Shpëtim Idrizi, në një opinion të botuar në disa të përditshme
shprehet se gjatë vizitës që ministri Jashtëm, Edmond Panarit do të
kryej në Athinë në fillim të muajit tetor duhet të adresojë problemin e
komunitetit çam. Gjithashtu Idrizi kërkon që pjesë e delegacionit të
jetë edhe një deputeti i PDIU-së.
“Si pjesë e zotimit të aleatëve tanë
qeverisës që ta ngrenë çështjen çame në kontaktet diplomatike me
Greqinë, unë dua t’ia kujtoj publikisht z.Panariti këtë zotim. Mesazhet
që unë në emër të këtij zotimi dua t’i përcjell z.Panariti në emër të
komunitetit çam, si pjesa vitale, si mbështetja natyrale e partisë që
përfaqësoj, nuk janë mesazhe sekrete, ndaj po zgjedh rrugën e një
shkrimi në shtyp, që ato të mbërrijnë deri tek ai, por dhe te publiku”,
shprehet Idiriz.
Kreu i PDIU-së thekson se ministri i
Jashtëm grek, Avramopulos, “në cilësinë e kryetarit të Bashkisë së
Athinës ai ka mbajtur vazhdimisht qëndrime miqësore, integruese ndaj
emigrantëve shqiptarë në Greqi” dhe “kjo na jep shpresë se ky ministër,
në këtë frymë, të paktën do ta dëgjojë me vëmendje dhe jo vetëm do të
flasë në takimin me z.Panariti”.
Idirizi nënvizon se, “ky është problemi
më i madh në takime si këto: pala shqiptare vetëm dëgjon, ose në rastin
më të mirë ngre vetëm një numër problemesh që ngjajnë si aktuale, por jo
problemet më të rëndësishme. Pala shqiptare vetëm mban shënim çfarë
problemesh ngre pala greke, pala e fortë, probleme që siç e dimë të
gjithë janë shpesh të ngritura artificialisht”.
Lideri i partisë çame bën thirrje që
Shqipëria të mos sillet inferiore ndaj Greqisë. Idrizi thotë se tani
është koha që çështja çame e cila është ngritur në termat më
maksimaliste nga ish-kryeministri Meksi, ish-ministri i Jashtëm Serreqi
dhe Berisha gjatë kohës që ishte president.
“Ne duam drejtësi europiane si shpagim
për gjenocidin e asaj kohe. Ne duam pranim të asaj që ka ndodhur; ne
duam ndjesë për atë që ka ndodhur, sipas modeleve më të mira të
pajtimit; ne duam një zgjidhje pajtuese sipas parimit të
shpirtgjerësisë, që i ka propozuar dikur Greqisë, edhe ish-zv.ambasadori
amerikan në Greqi. Ne duam drejtësi europiane, jo hakmarrje
ballkanike”, shkruan kreu i PDIU-së.
Në fund Idrizi shprehet se, “po piqet në
gjirin e komunitetit biznesor shqiptar ideja e blerjes së disa ishujve
grekë, dhe siç e tregoi komuniteti i ishullit Ikarios, ky skenar madje
është i kënaqshëm për qytetarët grekë të tij. Ata thonë se janë gati të
bashkohen me Shqipërinë më mirë sesa të blihen nga Turqia”.
Shekulli Online
F.Stafa
No comments:
Post a Comment