sent by KJorgji
Publikuar më 22.01.2014 | 17:38
Këshilli i Ministrave, në mbledhjen e paradites së sotme, ka
vendosur të krijojë Agjencinë Kombëtare të Bregdetit. Ky lajm u bë i
ditur nga ministrja e Turizmit dhe Zhvillimit Urban, Eglantina Gjermeni,
në një deklaratë për mediat, të dhënë pas mbledhjes së Këshillit të
Ministrave.
“Kam kënaqësinë t’ju komunikoj sot një tjetër premtim të mbajtur, një
ndër objektivat e përcaktuara gjatë fushatës elektorale, krijimin e
Agjencisë Kombëtare të Bregdetit. Këshilli i Ministrave miratoi sot, më
22.01.2014, me propozim të Ministrisë së Zhvillimit Urban dhe Turizmit,
krijimin e Agjencisë Kombëtare të Bregdetit. Vendimi i sotëm i jep një
tjetër hov nismave të ndërmarra nga Ministria e Zhvillimit Urban dhe
Turizmit, që synojnë mbrojtjen e pasurive natyrore të zonës bregdetare
dhe promovimin e vendit si destinacion turistik. Agjencia Kombëtare e
Bregdetit do të shtrijë veprimtarinë e saj në të gjithë brezin bregdetar
të Republikës së Shqipërisë, brez i shpallur nga Këshilli Kombëtar i
Territorit si zonë me rëndësi kombëtare. Agjencia do të organizohet në
Drejtori të Përgjithshme, në nivel qendror dhe në katër degë rajonale.
Agjencia Kombëtare e Bregdetit do të ketë 30 punonjës dhe shpenzimet do
të mbulohen nga buxheti i ministrisë”, -sqaroi ministrja Gjermeni.
Gjermeni bëri publik edhe një tjetër vendim të marrë sot nga Këshilli
i Ministrave, që është shfuqizimi i projektit koncesionar, i
parashikuar të zbatohej në zonat bregdetare plazh Dhërmi dhe plazh
Perivoll.
“Njëkohësisht dua t’u bëj me dije, një vendim tjetër të rëndësishëm
të Këshillit të Ministrave sot në përmbushje të prioriteteve të qeverisë
për kthimin e Shqipërisë në një destinacion atraktiv turistik.Një nga
vendimet që u mor sot, ishte vendimi për shfuqizimin e projektit
koncesionar i parashikuar të zbatohej në zonat bregdetare plazh Dhërmi
dhe plazh Perivoll. Konsiderohet në fakt si një hap i rëndësishëm i
iniciativës qeveritare, e cila do të thellohet dhe do të vazhdojë më tej
me marrjen e masave te mëtejshme të karakterit legjislativ, duke synuar
kthimin e plazhit dhe të brezit bregdetar për përdorim në interes të
publikut”, -përfundoi ministrja Gjermeni.
/Shekulli Online/ E.B./
No comments:
Post a Comment